الاثنين، 14 مايو 2012

مــــــــــاريونـــــــــــت


عمرك حيست إن اللي قدامك وبيكلمك مش دي كلامه ولا دي حركاته ...وتقول ياتري مين وراك ولا مين الي بيحركك ..
كتير بتحصل معانا ..والأدهي من كده ان مبنكتشنفش ده غير بعد فترة طويلة أوي وأول حد بيتأذي  هو اللي بيكلمنا مباشر ,وساعات نبقي عارفين من اللي بيحرك الشخص ده وكلنا كلنا عارفين ومتأكدين بس مفيش إثبات .

وطبعاً كلنا عارفنين إن أغلب شبكات المخدرات ولا حتي سرقة الأعضاء بتمشي بنفس الطريقة دي ..

وكلنا برضه عارفين , إن إسرائيل اللي بيحركها من وراء الستار هي أمريكا, علي الرغم إن الستار بأه شفاف أوي ومكشوف , إلا إننا لسه بنصدق أمريكا وبنعادي إسرائيل وإنها هي السبب والكلام اللي كلنا عارفينه .

طيب السؤال بأه علي الرغم من إن إحنا كاشفين أمريكا وعمايلها مع العرب ودفاعها عن إسرائيل المستميت ويا عيني إنهم شعب غلابة قاعدين في حتة أرض صغيرة جداً وفي ناس أشرار-فلسطنيين-  عمالين يحدفوا عليهم طوب ...وإنهم يا حرام يادوب بيدافعوا عن نفسهم بالدبابات والرصاص المطاطي وغيره من الأسلحة اللي ضعيفة جداً قدام صرخات أم فقدت إبنها ولا حتي كل أهلها.

كلام ممكن يكون إتقال في خمستلاف مقال قبل كده بس نكمل للآخر  ..طيب نروح شوية علي السودان ..أقصد السودان الشمالية والسودان الجنوبية , ها  مين السبب  ..ومين مصلحته أن دولة السودان اللي كانت من أكبر الدول الأفريقية مساحة وفيها موارد عظيمة إنها تنشق وعلي إيه أساس الإنشقاق , علي أساس ديني .
وإحنا كلنا عارفين إن أشد الانقسامات اللي بيكون أساسها إنشقاق ديني .

طيب ننقل علي الصومال ولا تحب نطلع علي تونس ومنها علي مصر ونشقر علي سوريا وننزل علي ليبيا وقبلها اليمن ونروح علي إيران وقبل كل الدول دي , العراق طيب نرجع بالذاكرة شوية من اكترمن 15 سنة الحرب بين العراق والكويت .

وبعدها أفغانستان وباكستان والهند , طيب نركز علي الوطن العربي , من سنة بالظبط 
بداية بتونس ..الثورة قامت  , بعدها بكام يوم , مفاتش شهر , الثورة نورت في مصر , معداش كام شهر , اليمن وليبيا وسوريا , وما أدراك ما ليبيا وما سوريا .

ليبيا وسوريا ..حمامات دم  أقل ما يقال ..طيب نفكر مع بعض شوي .. الشعب فاق , قام بثورة , الثورة نجحت او لسه بتنجح . الحكومة تسقط وبعدها الجيش ينزل وقبل ما الحكومة تسقط نفس الاجراءات بتحصل.

طيب نفتكر مع بعض كده خطاب هيلاري كلينتون وأوباما لرؤوس النظام في مصر أيام الصورة .. يا ســـــــــــلام  , مش نظام مصر ده كان حبيبكم ودعمكم وانتوا دعمه .

طيب بلاش مصر .. سوريا .. ليبيا  ...واللي جاي بعده  وبعده  ...نفس الكلام بيتقال 
إيه الدربكة دي كلها , وما خفي كان أعظم

"ناعومي تشومسكي " بيقول "أمريكا وحلفئها من مصلحتها إنها تمنع الديموقراطية في العالم العربي مش عاوزة حكومات تعبر عن إرادة الشعوب وبالذات مصر وفي خطة محكمة نمطية تنفذ في مصر وتونس والدول العربية ولما يكون عندك طاغية عربي ..اقف جمبه ودعمه لآخر الخط , وأما خلاص يستحيل استمراره زيله,وقول إنك بتحب الديموقراطية والكلمات الرنانة عنها ولكن إبق علي النظام ولكن بأسماء جديدة  ".


وانا  رأيي .."الحكام العرب عند أمريكا زي العرايس الماريونت ,بيحركوهم زي ما يحبوا من ورا الستار ,وأول أما الخيط يتقطع أو الجمهور يمل , يجيبوا عرايس ماريونت تانية , بس المحرك الأساسي لها هو هو ".

ممكن يكون التشبيه مخيف ..معارض كلامي أو موافق عليه ...لكن الحال يبقي كما هو عليه ...

ممكن نركز شوية مع بعض ونوحد صفوفنا لإن الي جاي صعب ....فـــــــــــوقـــــــوا ....

ليست هناك تعليقات: