وحشتيني :))

أزيك عاملة أيه ؟؟

أنا عارفة إني بقالي كتير مجتش عندك ولا اطمنت عليكي , بس دايما ع بالي .

اما تكون بتحب حد وغايب عنه واما ترجعله تقوله وحشتيني


هترد تقول ايه  ؟؟

بجد مش عاوزاكي تزعلي ,لإنك وحشتيني أوي أوي 

وكمان وحشني أوي الكلام معاكي , وحشتني تفاصيلك وأحنا قاعدين نظبط الأشكال والألوان والخطوط .

وحشني أوي أما نفضل ندور علي صور وسط الألبومات  الكتير أوي  دي, ونفضل نقول طيب دي هتنفع لالا دي مش حلوة , بصي الصورة دي , طيب تعالي نجربها , تفتكري لايقه ع الكلام ولا لأ ؟

لا مش لايقة طيب تعالي ندور تاني , أيووووووه تمام دي كده 

يلا بأه ننشر ونشوف ونقرأ تاني  .

جميلة أوي الجملة دي , أيه ده مش ممكن هو أنا الي كاتبة ده , جميل جدا .  

ونفضل نشوف اراء اصحابنا سوا واحنا مبسوطين جدا مع بعضنا وفرحانين .
واخواتي هبه وسارة واصحابي يقولوا لي  منار تحفه جدا الكلام حقيقي مش كده ,  وتحفه جدا الصور , وانا بكون مبسوطة ليكي وبيكي  .

والناس بيزوركي كتير عشان يشوفوكي ويقروا كلامك  . 

أميرتي , تسمحيلي ارجع اكتب تاني معاكي وفيكي وليكي وبيكي , 

وتسمحي أني أزوك كل يوم زي الأول .

وأسفه لو انشغلت عنك ,  بس سامحيني  .

أميرتي بحبك ووحشتيني أوي  .

وبجد إن شاء الله مش هغيب عنك تاني .

ممكن  :))

بحبك يا أميرتي ............... يا مدونتي الجميلة :*

                             أشتقتلك   

كم أود إرتشاف القهوة

في لحظة ما تذوقت رائحة القهوة في الهواء من حولي , شعرت بسخونتها وبرائحتها المنعشة , تذكرت أيام الدراسة والإمتحانات عندما كنت أرتشف القهوة خلسة من دون علم أمي و أبي , لأنها -من وجهة نظرهم -سوف تضعفني وتصيبني بالهزال .


ولكن هيهات لم أكن أنصت لتلك الكلمات , بل أستمع إليها فقط .
عندما كنت أحضر القهوة , أضع البن مع السكر مع الماء في " الكنكة" وأحركها وأتركها لتتأثر بالحرارة , عملية كيميائية بحتة , أهدئ النار عليها حتي لا تزيد عليها الحرارة وتفور ويضيع "وش" القهوة, ثم أحضر فنجان أبيض مزين بإطار ذهبي وطبقه الذي يشبهه .


وها أنا أنقل القهوة من إناء لآخر ليتصاعد بخار محمل بحرارة ورائحة القهوة المنعشة ,استنشق عبيرها  وأعيش في عالم ملئ بحبيبات القهوة المختلفة  والمنعشة .


كم أنتِ رائعة أيتها القهوة !!!


عندما كنت بالثانوية العامة كانت القهوة خليلتي الليلية , كنت لا أشعر بمذاقها ولا برائحتها إلا وهي في الفنجان الأبيض المزين بإطار ذهبي , طعم ملْكي .


وبسبب حبي للقهوة والثانوية العامة أصبحت ماهرة بصنع القهوة 
بل  والأدهي من ذلك أنه في مجالس العائلة وأحياناً الأصدقاء , تطلب قهوة منار بالأسم , ويكون الجميع مستمتع بتلك القهوة.


 بعد ما انتهيت من الثانوية العامة والجامعة أيضاً , أحاول أن ارتشف القهوة , وبنفس الطريقة وبنفس الفنجان الأبيض المزين بإطار ذهبي , ولكن ......................


لم أعد أشعر ذلك الشعور الجميل عندما كنت ارتشفها  في أيام المذاكرة والإمتحانات .


يبدو أن القهوة اللذيذة أصبحت مقترنة بتعب المذاكرة والإمتحانات .


هكذا هو حالنا نحن البشر هناك من ذكريات وأحداث وأشياء مرتبطة بإحداث أو أشخاص من حولنا , وعندما نكررها مرة أخري لا نشعر بطعمها ولا بحلاوتها إلا بوجود تلك الأشياء وتلك الشخصيات .


بل وربما لمجرد أن رأينا شئ يذكرنا بموقف ما أو شخصية ما , فيحدث شئ عجيب , تشعر بأن شريط ذكريات مر أمام عيناك ليذكرك بما حدث.


الآن قد انتهيت من أمتحاناتي و كم أود إرتشاف القهوة بنفس الطعم من جديد !!!

نسيت !!!

من فترة قريبة جداً , حصلي موقف شخصي هزني جداً , بطريقة  أو بأخري  أتضايقت شوية .

وزعلت من نفسي مع إني أخترت الصح , بس ساعات الصح بيكون صعب أوي الإحتفاظ بيه , وخلاص بأه أنا

عاوزة أنسي اللي  ضايقني . 

طيب أعيط , مفيش  دموع  ولا جفاف الصومال , طيب أصرخ , غالياً هيتقال عليا مجنونة . 

ليه يتقال عليا كده , فسكتْ  , بس برضه مش قادرة ,محتاجة أخد رأي حد , محتاجة حد يدعمني , حكيت

لصاحبتي علي الموقف وبجد دعمتني جداً جداً , وبشكرها من كل كل قلبي والله أعز أصحاب   . 

طيب جيه وقت النسيان   , طيب أنسي  إزاي  وكان ده الحوار  :

 

# طيب ممكن أنا في حاجة مضايقاني وعاوزة أنساها ,

* عاوز تنسيها ليه ??

# عشان مضايقاني  ومسببالي ألم نفسي .

* طيب والإستفادة منها إيه ؟؟

# الإستفادة كانت هتكون معنوية .

* طيب عاوزة تنسيها ولا تتعلمي  منها ؟؟

# عاوزة الأتنين انساها وأتعلم منها .

*  الأتنين , مينفعش لازم إما تنسي لأما تتعلمي ,  

طيب أنا عندي طريقة , تنسي بيها  , أكتبي عشرين فايدة للموضوع لو كان بأه ملكك دلوقتي .

# لالا مش هيكمل العشرين فائدة .

* لأ لازم يكمل  , مينفعش.

 وهلم جرا في الحديث  وأستأذن مني لنكون علي لقاء بعد ساعتين لنكمل باقي كلامنا عن النسيان 

 وجاء اللقاء مرة أخري 

* ها , كتبتي عشرين فايدة 

# أنا نسيت خلاص

* نسيتي  إزاي !!!!

# بطريقتي , كتبت 

وهنا بأه كنت حاسة إن أنا يا إما مجنونة, يا إما مجنونة ,يا إما ربنا مديني هديه مش عند ناس كتير.

وبالفعل هي القدرة علي إني أنسي بجد الي مضايقني وأعيش يومي عادي جداً .

أكيد هزعل شوية , أنا بشر يعني مش مخلوق تاني أو مخلوق فضائي .

بس بجد نعمة من ربنا .

الموضوع نسيت ألمه , وتعلمت من خبرته  .

أديني بضحك وأنا بكتب أهو .

هو أيه الي كان مزعلني  ؟؟؟

حد يقول كده D: 

                                                           ^ ^ 

شريطة ساتان

 شريطة ساتان , لونها لون الوردة اللي جمبها .
الشريطة الستان  ناعمة وجميلة , تلسمها بإيدك ومترضاش تسيبها 
وأما تيجي تلف بيها هدية , بتقصها بالمقص وأنت فرحان ومبسوط ومش شايف قدامك غير إنك لازم تعمل كده  وتقصها عشان تبقي  الهدية كاملة .


أنا شريطة ساتان , هادية وناعمة والدنيا هي المقص وأما تيجي تلف بيا هدية عشان تبقي جميلة بيا أنا ومن غيري ولا هيكون لها معني , الدنيا بتقصني زي المقص وهي فرحانة وسعيدة ومبسوطة جداً , وأنا ممكن أزعل شوية ممكن نقول شويتين أو تلاتة .


والدنيا وهي بتقصني  بتوجعني وهي مش حاسة , بس أحلي  حاجة إن الهدية من غيري مهياش كاملة وهتبقي هدية زي أي هدية في الدنيا . 


في الآخر , أما بشوف الهدية وأنا محاوطاها بيا وبلوني الوردي , ببقي مبسوطة أوي وخلاص مش بزعل من الدنيا عشان قسيت شوية عليا .


ماهو لولا المقص  ووجعه  , مكنش هيبقي فيه هدية ولا أروع منها ولا أحلي  .... 


أنا من غيري الهدية ولا هتسوي  , أو هنقول هتبقي هدية عادية 
لكن بالشريطة الساتان الي هي أنا , هتبقي أغلي أغلي هدية .


                                      ^ ^     

سكرات ألم

سكرات ألم ..........أترنح منه .

وجع يمتلك القلب .......لا تحتويه كلمات .

جاء بصمت رهيييييب ........من حولي  .

لكن بداخلي تتناثر الكلمات .........قال وقلت .....قلت وقال  .

وأقارن وأتذكر وأتخبط ....................وصمتاً رجااااااااااااااء.

إنه كان منكِ غباء .................نعم ............ولكن كلنا نقع بالأخطاء.

فلم حبيبتي جلد الذات .

لا أعلم ..........ولكنه أنا  .

وأنا هي أنا .............أدقق وأحقق وأتحقق .

ولم لا ...........إنه الخوف الذي يعتليني ......إنه الصمت الذي آثرته .......إنه الغباء أو الدهاء لا أعلم .

أو لربما دهاء زائد عنه حده ......وانقلب الدهاء علي صاحبه .

رحمااااااااااااك ربي .........خلصني من ذلك التفكير .

تخبط , حيرة , ألم , ملل , كرامة , إنتزاع .

عيناي جاحظتان ..........من الألم , ربما الدهشة  ربما الإثنتان معاً .

جفت دموعها ............ من الحيرة والإستغراب , أو ربما هي الأخري آثرت الصمت .

لا أعلم كيف , متي , أين .............حتي هذه الكلمات لا أعرف لها هدف أو إنتماء  .

أترنح من الألم وكذلك كلماتي .............لم , لم كل هذا .

أنا فقط أريد سبب  !!